Gunnar Magnús og Erlingur Árni

Bestu vinir

2012-02-13T23:19:00.000Z

Hérna eru Gunnar Magnús og Tómsar fyrir utan hjá okkur einhvern snjóþunga daginn í janúar 2012. Tómas flutti til Svíþjóðar fyrir nokkrum vikum og við söknum hans og fjölskyldunnar hans mikið. Það hefur samt komið sér vel að eiga iPad, þar sem félagarnir hittast og spjalla og sýna hvorum öðrum dótið sitt.

Viðtal hjá ljósu - 28 vikur og 2 dagar

2012-02-08T15:57:00.001Z

Jæja, ég var að koma frá ljósmóðurinni, henni Gígju. Allt kom vel út en upp úr 30 vikum mun ég minnka vinnuna í 50%. Það er svona í ljósi fyrri sögu um háþrýsting og gallstasa. Gallstasinn var annars 12 micromól/L í síðustu mælingu, sem er undir viðmiðunarmörkum sem eru 15. Meðgöngusykursýkisprófið kom einnig vel út. Þá mældist ég 4,6 mmól/L fastandi en svo 8 eftir eina klst og 7 eftir tvær klst. Ég fór auðvitað beint á netið þegar ég kom heim, til að bera saman við hvernig ég var með Erling Árna. Þá voru þessar tölur dálítið lægri. Ætla að taka það til mín ;)

Bumban er orðin ansi myndarleg, mældist 31 cm, sem er 3 cm lengri en meðaltalið fyrir 28 vikna meðgöngu.

Þarf síðan að fara að smella af mér bumbumynd til að setja hingað :) Fer í málið!

Gallapagus III Gunnarsson/-dóttir

2012-01-30T11:44:00.005Z

Nú er ég gengin 27 vikur af þriðja gallapagusnum okkar Gunna :) Ég hef verið fletta upp í gömlum færslum frá því ég gekk með Gunnar Magnús og með Erling Árna, til að bera saman við þessa meðgöngu. Þá datt mér sú snilldarhugmynd í hug að byrja að documentera þessa! Þótt fyrr hefði verið, hehe. Þessi þriðja meðganga er um margt líkari þeirri með Erling. Ég er á svipuðu róli í þyngdaraukningu, blóðþrýstingi, bumbustærð o.s.frv. Undanfarið er ég þó farin að finna fyrir töluvert aukinni þreytu. Þar spilar kannski inn í að ég er búin að lækka mikið í járni, þó ég sé enn þá í góðum málum. Meðgangan byrjaði í 158 í járni en ég er núna komin niður í 118. Það hlýtur að muna töluverðu í ferskleika. Enda fannst mér ég ekkert þreytt framan af. Núna get ég lognast út af nokkrum sinnum yfir daginn. Stundum þó með þeim afleiðingum að geta ekki sofnað kvöldið á eftir. Sjaldnast þó.

Í fyrradag fann ég í fyrsta skiptið hiksta hjá litla krúttinu. Mér finnst það svo yndislegt og verð svo stolt. Þá er það byrjað að æfa sig að anda :) Það er mjög gott að æfa það vel áður en maður fæðist :)

Hérna er Gallapagus III í 20 vikna sónar. Í góðu tjilli með hönd undir vanga.

Long time no blog

2011-05-04T22:37:00.005Z

Jæja. Engar afsakanir. Nú skal skrifað hérna áfram, þótt það verði nú fáar ritgerðir... Mér finnst bara svo ótrúlega gaman að eiga minningar niðurskrifaðar þegar fram líða stundir.

Um síðustu helgi fórum við í bústað í Vaðnesi með Nikka, Stebba Eiríks og sonum. Það rigndi nánast sleitulaust alla helgina, sem mér fannst nú bara huggulegt. Gróðurilmurinn varð sterkari og róandi var að sitja inni og hlusta á regnið falla á þakið. Erlingur vígði gamla apapollagallann hans Gunnars Magnúsar og hafði ótrúlega gaman að því að leika sér úti í blautu polla- og ánaðmaðkaumhverfinu. Það var yndislegt að fylgjast með honum.

Ommuh!

Ví = róla á erlingsku.

Alltaf er þessi Mamma eitthvað að ráðskast með mann...

Erlingur Árni 1 árs - Myndir

2010-09-04T23:38:00.001Z

Lítill álfur með pabba sínum

2010-07-11T07:10:00.000Z

Litli kroppurinn

2010-05-31T09:02:00.000Z

Sofandi bræður

2010-05-17T12:10:00.001Z

...passa hvorn annan.

Bræður að morgni

2010-05-17T12:06:00.000Z

Kókosbollugerð með Völu

2010-03-12T11:56:00.000Z

Úlfdís Vala í heimsókn

2010-03-12T11:55:00.000Z

Allt í graut

2010-03-12T11:53:00.000Z

Hanna Sigga í heimsókn

2010-03-12T08:35:00.001Z

Hanna Sigga er vinkona Gunnars Magnúsar af leikskólanum. Ég sótti þau á leikskólann um daginn og þegar við vorum að labba upp stigaganginn hérna heima er Gunnari Magnúsi svo mikið í mun um að vera fyrstur að hann ýtir aðeins við henni til að komast á undan. Þetta sárnaði Hönnu Siggu að sjálfsögðu og sagði mjög ákveðið við hann: "Gunnar Magnús! Svona gerir maður ekki við BESTU vinkonu sína!!!".

Tómas í heimsókn

2010-02-15T19:53:00.000Z

...og félagarnir horfa á DVD í "litla sjónvarpinu".

4ra ára afmæli Gunnars Magnúsar

2010-02-07T18:54:00.004Z

Gunnar Magnús hélt upp á afmælið sitt í gær og bauð nokkrum krökkum af Öldukoti til sín. Hann var búinn að vera svo spenntur að fá þá að þegar þeir loksins komu, þá hringsnerist hann í spenningnum og vissi ekki hvernig hann átti að vera. "Ég er svo æstur! Ég er svo æstur!!" voru svörin sem Pabbinn fékk þegar hann sagði honum að vera ekki svona æstur og þakka fyrir sig! Svo jafnaði hann sig nú fljótlega. Krakkarnir léku sér, fengu sér hressingu og fóru í leiki. Allt gekk þetta merkilega vel fyrir sig og var Gunnar Magnús alsæll með þetta allt saman.

Arndís Áslaug í heimsókn

2010-02-06T01:20:00.001Z

Brosað.

Grínað.

Borðað.

Grínað meira.

Flott G!

2010-02-06T01:17:00.000Z

Stoltur strákur :)

Sigrún Elísabet í mat

2010-02-06T01:16:00.000Z

Gunnar Magnús bauð Sigrúnu Elísabetu í mat um miðjan janúar. Boðið var upp á dýrindis kjötbollur og karpellur.

Erlingur 5 mánaða - Beauty shots

2010-02-06T01:13:00.000Z

Og loksins hittum við Jakob!

2010-02-06T01:10:00.001Z

Brynja og Gummi með vinina.

Brynja með fullt fang af fríðum piltum :)

Loksins hittust vinirnir Erlingur og Jakob en Jakob býr í New York og er 6 dögum yngri en Erlingur. Þeir eiga eflaust eftir að bralla mikið saman í framtíðinni :)

Þriðji í jólum

2010-02-06T01:06:00.001Z

Heimsókn frá Ameríku á annan í jólum

2010-02-06T01:01:00.000Z

Emma, Klara og Sylvía með Erlingi Árna

Benedikt með Gunnar Magnús í bakgrunninum að leika sér með Ben10 brautina sína, ferska úr jólapakkanum.

...og hérna í forgrunni.

Maríanna hafði einnig í nógu að snúast.

Myndir frá öðrum í jólum 2009

2010-02-04T13:22:00.000Z

Myndir frá aðfangadagskvöldi 2009

2010-02-04T13:07:00.000Z

Erlingur Árni 6 mánaða

2010-01-25T13:30:00.002Z

Í dag er yngri prinsinn hálfs árs og fékk graut í fyrsta skiptið, í tilefni dagsins. Elsku kallinn er orðinn svo duglegur! Það var eins og hann hefði aldrei gert annað en að borða fasta fæðu. Opna, kjammsa, kyngja - Opna, kjamsa, kyngja.... :):):)

Súperman og Spiderman - Góðir saman :)

2009-12-20T12:33:00.000Z

Fyrsta "alvöru" pössunin

2009-11-25T14:24:00.001Z

Vala frænka heldur góðum höndum á frænda sínum.

Vala frænka kunni sko allt sem þarf að kunna til að hugsa um ungabörn.

Erlingur Árni var passaður í fyrsta skiptið í marga klukkutíma núna í byrjun nóvember. Þá fóru foreldrarnir á árshátíð Mannvits. Stína, Vala og Stefán voru ráðin til verksins og allt gekk eins og í sögu. Nokkrum dögum fyrir hafði mamman leigt rafræna mjaltavél og var búin að safna mjólkurbirgðum fyrir kvöldið. Ekki vildi Elli taka pela, þ.a. honum var bara gefin mjólkin með skeið, enda er það miklu meira fullorðins og töff :)

Björg í heimsókn

2009-11-13T10:57:00.001Z

Björg er "lítil" vinkona Erlings sem fæddist 11. október síðastliðinn. Björgu liggur svolítið á að verða stór og er þegar orðin svolítið stærri en Erlingur! Hann er þó lengri, enn þá alla veganna :)

Híhíhí... Fía, mamma Bjargar, er svo fyndin :)

Mútter og Elli

2009-11-13T10:55:00.000Z

Á mallanum

2009-11-13T10:54:00.000Z

Þetta froskadót er í uppáhaldi hjá Erlingi. Spilar lög og lætur ljós blikka, ekkert smá spennó :)

Gunnar Magnús og félagar

2009-11-13T10:52:00.001Z

Gunnar Magnús og Tómas fá sér hressingu. Tómas er vinur Gunnars Magnúsar af Öldukoti og býr í næsta húsi.

Þórhildur Þorsteinsdóttir, dóttir Steina og Gunnsu, vina okkar frá Seattle-tímum, kom í heimsókn um daginn.

Gunnar Magnús og Vala gæða sér á skyri. Gott fyrir beinin...

Litla bjútíið

2009-11-13T10:51:00.000Z

Say what??

2009-11-13T10:50:00.000Z

Bræður horfa á barnatíma

2009-11-13T10:49:00.002Z

Gunnar Magnús hélt voða sætt á bróður sínum. Hann bað mig vinsamlegast að hlaupa og sækja myndavél til að documentera það. Óendanlega sætir bræður :)

Erlingur Árni tjillar í jogginggallanum

2009-11-13T10:47:00.000Z

Ekkert smá töff fjölskylda spilar Rockband

2009-11-13T10:46:00.000Z

Gunnar Magnús 3ja ára og 8 mánaða

2009-10-22T23:35:00.002Z

Vá! Ég veit ekki einu sinni hvar ég á að byrja til að skrifa um stóra strákinn minn. En það er kannski besta orðið sem á við hann núna: stór! Þegar drengurinn eignaðist lítinn bróður, þá tók hann þvílíkt þroskastökk. Bæði andlega og líkamlega. Hann óx ábyggilega um 5 cm í júlímánuði! Þessi stóri strákur hefur þróað með sér afskaplega sterka félagsþörf. Það er alveg glatað að vera einn heima. Hann er alltaf að biðja mig að hringja í mæður vina sinna til að gá hvort hann megi koma í heimsókn eða þeir í heimsókn til hans. Einnig eru frændsystkinin vinsæl. En vinir hans, Elvar og Tómas eru duglegir að koma í heimsókn og Gunnar Magnús að heimsækja þá. Það er miklu auðveldara að vera með Gunnar Magnús, Erling Árna og einn félaga, heldur en bara bræðurna.

Gunnar Magnús er afskaplega góður við bróður sinn. Hann sækir sérstaklega í hann þegar hann er lítill í sér. Þá vill hann hafa hann nálægt sér og "mjúka" honum, eins og hann segir. En það getur líka verið erfitt að þurfa yfirleitt að bíða, stundum lengi, eftir þjónustu. Þá getur maður orðið pirraður. "Mamma, núna!!! Mamma núna!!!! Ég get ekki bíðað lengi!", heyrir maður stundum. Þannig að þetta getur líka tekið á.

Í lok ágúst byrjaði Gunnar Magnús á eldri deildinni í leikskólanum, Melhúsi. Þar eru krakkar frá 3ja til 5 ára. Honum gengur mjög vel þarna, enda fór allur hópurinn hans í einu upp. Þetta er mun meira krefjandi umhverfi og hann stendur sig ótrúlega vel. Svo kemur hann heim með þessa fínu mannasiði, eins og til dæmis að fara alltaf með diskinn sinn í vaskinn. Stundum gleymir maður sér hvað drengurinn er orðinn stór og getur mikið :)

Erlingur Árni 3ja mánaða

2009-10-22T23:29:00.003Z

Nú er Erlingur Árni að verða þriggja mánaða eftir nokkra daga. Við fórum í heimsókn á heilsugæsluna í vikunni og reyndist pilturinn vera orðinn 5,07 kg og 60 cm eða 61, man ekki alveg. Það er ekki hægt að segja annað en að drengurinn sé nettur en hann samsvarar sér afskaplega vel. Hann er miklu minna fyrir að drekka en bróðir hans var. Það er alveg skýrt hvenær hann vill ekki meir og þá vill hann alls ekki meir. Hjúkkan stakk upp á að gefa honum þurrmjólk en ég hálfandmælti því, þar sem það er eins og hann vilji hreinlega ekki meira að drekka, frekar en að mjólkin sé búin í búðinni. Þannig að núna ætla ég að prófa einu sinni til tvisvar á dag, að pumpa mig eftir að hann er hættur og reyna að mata hann af restinni. Því það er hitaeiningaríkasta mjólkin sem kemur í lok gjafar. Vonandi gefur hann þá svolítið í :) En ég vil alveg endilega frekar gefa honum meira af móðurmjólkinni heldur en að fara að rugla framboð-eftirspurn-kerfið sem brjóstamjólkin býður upp á.

Litli kútur er farinn að sýna dóti mun meiri áhuga en hann gerði. Í uppáhaldi er forláta froskur sem hægt er að hengja á barnabílstólinn hans en við notum all over. Hann spilar nokkur lög og tekur litli gjarnan við sér og brosir sínu blíðasta til hans.

Afmæli Öglu og Grétu 10. október

2009-10-16T15:00:00.004Z

Við fórum upp í Kórsali til Jóhönnu og Jóns um síðustu helgi. Tilefnið var afmæli Öglu Þórunnar, eldri, sem varð sextug 16. október og afmæli Grétu sem varð 25 ára 12. október. Alltaf er gaman þegar fjölskyldan kemur saman og reynum við að gera það einu sinni í mánuði yfir vetrartímann. Annar laugardagur í hverjum mánuði sem inniheldur bókstafinn "r" er frátekinn fyrir þessa hittinga. Við hittumst hjá Jóhönnu og borðum yfirleitt hamborgara og höfum það huggulegt saman.

Stundum grætur maður... :(

2009-10-16T14:59:00.001Z

...en maður er alltaf jafnsætur :)

EÁ 2ja og hálfs mánaða

2009-10-16T14:59:00.000Z

Sæll og glaður :)

Mamman að láta mann púla við bakæfingar!

Hi there!

Hjá Ömmu Hildi

2009-10-06T15:03:00.000Z

Við brugðum okkur í leikhúsferð til Grindavíkur að sjá Með horn á höfði. Skemmst er frá því að segja að þeir sem fóru skemmtu sér konunglega og er óhætt að mæla með sýningunni fyrir alla :) Ég og Erlingur Árni vorum bara heima hjá Ömmu á meðan og misstum af leikhúsinu en höfðum það huggulegt saman.

Þegar tilbaka var komið fóru menn að leika sér við hitt og þetta áður en við gæddum okkur á gómsætum saltfiski hjá Ömmu og Óla.

Stefán og Amma í tölvunni og eldhúsinu.

Vala bjútí.

Erlingur Árni spjallar við Mömmu

2009-09-26T11:52:00.002Z

Sætustu bræðurnir :)

2009-09-17T14:55:00.000Z

Stóri bróðirinn er sísprellandi...

...ekkert smá fyndinn :)

Feðgar spila Rock Band

2009-09-17T14:53:00.000Z

Nýtt leikteppi

2009-09-17T12:45:00.000Z

Nýtt dót var að koma í hús. Forláta leikteppi frá vinnufélögum mömmunnar á Vatnaskilum.

Stundum er maður þreyttur, þó það sé gaman :)

Svo hnerrar maður líka...

Ahh... Fínt að tjilla hér.

Minning

2009-09-10T00:25:00.005Z

Í dag var Erlingur Árni passaður í fyrsta skiptið. Hann fór í göngutúr með Ömmu Hildi á meðan foreldrarnir fóru í kistulagninu elsku Afa Leifs. Pössunin gekk ljómandi vel eins og við var að búast. Við EÁ fórum svo með Ömmu Hildi að leiðinu hjá Afa Stefáni en í dag eru liðin 20 ár síðan hann féll frá. Hvíl í friði, elsku Afi Leifur og Afi Stefán.

Afi Stefán: Stefán Brynjólfsson, fæddur 13. október 1933, dáinn 9. september 1989.

Afi Leifur ásamt beinum karllegg í afmæli Afa Erlings þann 9. janúar 2007.

Leifur Eiríksson, fæddur 3. júní 1907, dáinn 1. september 2009.

6 vikna

2009-09-10T00:22:00.001Z

Erlingur Árni fór í 6 vikna skoðun í dag. Hann er orðinn 4,45 kg og rúmlega 55 cm! Færir sig meira að segja upp um flokka á kúrvu. Hann er orðinn í meðallagi langur m.v. aldur, sem er nú meira en hægt er að segja um Mömmuna til dæmis.

EÁ Þriggja vikna

2009-08-26T22:25:00.000Z

Heimsókn hjúkrunarfræðings

2009-08-20T14:13:00.003Z

Hjúkkan af heilsugæslustöðinni var að heimsækja okkur Erling Árna áðan. Pilturinn er orðinn 3900 grömm, nú þegar hann er 26 daga gamall. Hann hefur því bætt á sig 350 grömmum á 9 dögum, sem Mömmunni finnst ótrúlega flott hjá stráknum sínum :) Næsta mæling verður svo ekki fyrr en hann verður 6 vikna.

Erlingur Árni skírður

2009-08-17T12:42:00.002Z

Nóg að gera

2009-08-15T16:57:00.000Z

Það er nóg að gera hjá uppteknum stóra bróður... tala í símann... passa þann litla...

Bræður sofa...

2009-08-15T16:55:00.000Z

...í sömu stellingunni.

Góðir vinir

2009-08-15T16:53:00.000Z

Gunnar Magnús og Elvar vinur hans á leikskólanum. Þegar við komum að sækja hann, þá voru þeir í óðaönn að baka kökur. Sandi var mokað ofan í fötu og svo hvolfdu þeir henni, mjög samtaka. Síðan var talið í kór upp að ellefu og þá var kakan tilbúin!

Fyrsti göngutúrinn

2009-08-15T16:50:00.001Z

Þann 11. ágúst fór Dúlli út í vagninn í fyrsta skiptið. Leiðin lá á Öldukot að sækja stóra bróðurinn, sem var að vonum kátur. Hér getur líka að líta hið fræga Leiftur McQueen hlaupahjól sem frumburðurinn vann sér inn þegar hann hætti með duddu í vor :)

Allir að máta Dúlla

2009-08-15T16:48:00.000Z

Íris vinkona kom og mátaði mig.

Hjá Stínu frænku.

Víðir og Þórdís prufukeyrðu mig. Þeirra ungi er væntanlegur í lok september :)

Þórdís var voða hrifin af mér :)

Fleiri myndir...

2009-08-12T14:51:00.001Z

Ég setti nokkrar myndir frá fyrstu 10 dögunum á Facebook, smellið hér.

17 daga gamall

2009-08-11T14:56:00.000Z

Dúlli litli er nú orðinn 17 daga gamall. Áðan kom hjúkrunarfræðingur til okkar af heilsugæslunni til að vigta gullklumpinn og hann var 3550 grömm, sem er aldeilis flottur árangur, þar sem hann var 2940 grömm í 5 daga skoðuninni. Drengurinn er líka afskaplega duglegur að drekka :) Svo kemur hjúkrunarfræðingurinn aftur á föstudaginn eftir viku.

Stóri bróðir er byrjaður á leikskólanum og unir sér afskaplega vel. Hann var greinilega kominn með nóg af því að vera í fríi, þar sem allir dagar voru mismunandi. Við höfðum rætt það lauslega við hann að bráðum myndi hann fara yfir á stóru deildina, þar sem krakkarnir leggja sig ekki og enginn er með duddu. Drengurinn er búinn að þroskast svo mikið síðastliðinn mánuð að það er ótrúlegt. Honum hefur greinilega fundist það einnig sjálfum, því hann ætlaði bara strunsa framhjá sinni deild og fara beint upp á stóru deildina þegar pabbi hans fór með hann á leikskólann í gær. Hann var því svolítið vonsvikinn að þurfa að fara til "litlu" barnanna en einn kennarinn sagðist skyldu fara með hann upp síðar um daginn í heimsókn.

Dúlli litli 9 daga

2009-08-03T14:23:00.002Z

Jæja, nú er Dúlli litli orðinn 9 daga gamall. Litli drengurinn er algjört ljós og drekkur og sefur, alveg eins og hann á að gera :) Ljósmóðirin sem hefur komið og heimsótt okkur í heimaþjónustunni útkskrifaði okkur með glæsibrag í dag, var mjög ánægð með hann. Sagði að hann væri kominn með svokallaðan mjólkurmaga :) Á næstunni mun svo koma til okkar hjúkrunarfræðingur og vigta litla prinsinn.

Stóri prinsinn, Gunnar Magnús, er algjör drauma-stóri-bróðir. Hann er svo ljúfur og góður við bróður sinn og vill oft hafa hann hjá sér. Þegar Dúlli grætur, spyr hann stundum hvort hann gráti því hann sé ekki hjá honum. Ofurnæma Mamman tárast alveg við að skrifa þetta. Þvílíkt ríkidæmi!

Dúlli litli 6 daga gamall

2009-08-01T17:48:00.000Z

Fyrsta fjölskyldumyndin af okkur fjórum :)

2009-08-01T17:45:00.000Z

Bræðurnir

2009-08-01T17:44:00.001Z

Gunnar Magnús heldur á litla bróður sínum í fyrsta skiptið :)

Dúlli mættur!!!

2009-07-29T12:52:00.001Z

Dúlli litli ákvað að skella sér sjálfur í heiminn barasta! Ég var rétt búin að skrifa færsluna hérna fyrir neðan þegar vatnið fór... Það var ljósgrænt þ.a. ég fór strax upp á spítala. Engar hríðir hófust að sjálfu sér innan tveggja tíma, þ.a. mér var gefin hálf cytotec tafla til að ýta hlutunum af stað. Dúlli lét ekki segja sér það tvisvar og var fæddur 80 mínútum eftir að ég stakk töflunni upp í mig. Fæðingarlengd í skýrslunni okkar er skráð 39 mínútur! Enda var þetta hríðarstormur, góðan daginn! Ljósmæðurnar náðu að koma í tíma og grípa hann, ég náði ekki að príla upp í rúmið. Hviss, bang, Dúlli mættur!

Dúlli vóg 3195 g og var 48 cm. Nettur, lítill snillingur :)

Gangsetning á mánudag!

2009-07-25T15:45:00.002Z

Í liðinni viku var ákveðið að ákveða dag fyrir gangsetningu ef ég væri ekki farin af stað. Ég á að mæta á mánudaginn, 27. júlí! Þá verð ég komin 39 vikur og 3 daga. Ástæða gangsetningar fyrir 40 vikur er þessi blessaði háþrýstingur hjá mér og einnig hækkun í gallsýrum. Á miðvikudaginn fór ég í blóðprufu og var gildið komið upp í 32. Ég fékk því einnig lyf við því.

Síðustu vikurnar hafa verið býsna einfaldar hjá mér. Ég hef tekið því alveg ofurrólega og varla farið út fyrir hússins dyr. Gunni hefur verið alger ofureiginmaður og séð um allt. Veðrið hefur verið alveg yndislegt það sem af er júlí og hafa feðgarnir verið duglegir að fara í sundferðir, húsdýragarðinn og fleira til að njóta veðurblíðunnar. Einnig hafa fjölskyldurnar okkar verið afskaplega duglegar að hjálpa okkur. Knús á þær :)

Annars rak ég nú augun í forsíðu Vikunnar, stærðarinnar fyrirsögn: Spáir stórum jarðskjálfta 27. júlí! Hún minnist á tímasetninguna 23:15 eða klukkustundina fyrir miðnætti... Pant bara vera búin að eiga Dúlla þá :)

Nokkrar myndir frá 17. júní

2009-07-19T19:30:00.000Z

Fjölskyldan gæddi sér á bakkelsi í bakaríi eftir að hafa horft á skemmtiatriðin við Arnarhól.

GMG sýndi rosalega takta í hoppukastalanum. Mömmunni varð um og ó að horfa á eftir "litla" stráknum sínum hverfa inn í kastalann með öllum stóru krökkunum....

En Gunnari Magnúsi fannst þetta æði!!!

Svolítið sætur!

Læknaheimsókn 37v+4d

2009-07-16T18:01:00.003Z

Ég fór og hitti lækni á þriðjudaginn og staðan er bara óbreytt hvað varðar þrýsting og lyfjagjöf. Ég held áfram á sama skammti for now. Legbotninn mældist 37 cm og Dúlli var með hjartsláttinn í 145-150 slögum á mínútu. Svo er ég búin að léttast eitthvað, þannig að í heildina hef ég þyngst um rúm 6 kg. Ég er er nú ekki að hreyfa mig neitt sérlega mikið um þessar mundir, þannig að ætli vöðvarnir séu ekki bara að slappast og valda þessu þyngdartapi.

Almenn líðan er bara eins. Ég get afskaplega lítið gert, þar sem úthaldið er rosalega lítið. Mig grunar eiginlega að það sé útaf lyfjunum frekar en háþrýstingnum, því ég var nú ekki alveg svona slow í síðustu viku. Undirbúningur hérna heima fyrir komu litla barnsins okkar er nú alveg á lokastigi. Búið er að setja upp skiptiborð og vaggan er komin í hús. Búið er að þvo ásættanlega mikið af fötum og pakka niður í hospital bag (maður má nú vona að maður fari sjálfur af stað í þetta skiptið!). Góð vinkona kom við um daginn og lánaði mér fæðingarbolta og fleiri fæðingar-essentials sem tengjast jógatímunum. Jafnframt er búið að fjárfesta í nýrri stafrænni vídjókameru, sem er möst þar sem hin gamla var illa biluð. Þannig að við erum bara svo gott sem tilbúin :)

Læknaviðtöl og fleira 34-37 vikur

2009-07-10T19:53:00.000Z

Sunnudaginn 21. júní skellti fjölskyldan sér í sveitaferð. Leiðin lá upp í Grímsnes og nágrenni þar sem við heimsóttum opinn bóndabæ og skoðuðum sveitalífið. Nokkuð skyndilega fer mér að vera illt í maganum og bakinu, svona eins og í maganum sjálfum (ekki bumbunni) og út í bak, þar fyrir aftan. Þar sem við vorum einum og hálfum tíma frá Reykjavík vildi ég bara dúndrast í bæinn í hvelli, bara svona til öryggis. Eftir símatal við meðgöngudeildina á Lansanum þá fór ég heim og hvíldi mig til að sjá hvort þetta lagaðist ekki. Það gerði það nú ekki og mér var farið líða býsna illa og vera stressuð yfir þessu, því mér fannst virkilega eitthvað vera að. Þá segja þær mér að koma upp eftir í tékk. Ég mætti um klukkan níu um kvöldið. Til að gera langa sögu stutta, þá var ég þarna fram á þriðjudag undir eftirliti og í rannsóknum. Niðurstaðan við útskrift var að ég var líklega með gallsteinakast, þ.e. steinn hefur myndast í gallblöðrunni og hann hefur náð að skila sér í gegn. Þessi kenning fékkst frá því að blóðprufur frá sunnudagskvöldinu sýndu brenglaða lifrarstarfsemi en á þriðjudagsmorgni virtist hún vera nokkurn veginn komin í lag. Ómskoðun á mánudeginum á lifur, brisi og gallblöðru komu eðlilega út. Á spítalanum mældist ég líka með háþrýsting, enda þekkti ég það frá því ég átti Gunnar Magnús að ég mælist ekkert sérstaklega vel í þrýstingi inni á svona stofnunum :S

Svo förum við upp í bústað og erum þar í tæpa viku. Ég var með þrýstingsmæli með mér og var yfirleitt í kringum 130/80 allan tímann þar. Ég gerði pásu á sumarbústaðardýrðinni 30. júní til að hitta lækni í bænum og aftur mælist ég svona há í þrýstingi (148/92). Hún vildi því sjá mig aftur á föstudeginum og endurtaka blóðprufur (lifrarpróf og gallstasa (væg hækkun hafði átt sér stað í gallstasa í kringum fyrri spítalainnlögnina)). Blóðprufurnar komu vel út en aftur var ég svona há í þrýstingi (151/95) og hjartslátturinn hjá Dúlla litla var rosalega hár (í kringum 180-190), einnig var bumban allt í einu 2 cm minni (mældist 33 cm). Þetta kallaði á vaxtarsónar og mónitor. Hvort tveggja kom vel út. Dúlli litli var áætlaður um 2684 grömm þá, við 36 vikur. Hann hefur því líklegast verið að koma sér neðar í mjaðmagrindina, sem getur valdið svona droppi í legbotnshæð.

Jæja. Á þessum tímapunkti finn ég að þrýstingurinn er farinn að hækka. Úthaldið var minn einhvern veginn og ég var með svona vægan spennuhöfuðverk. Á þriðjudeginum 7. júlí fer ég og hitti ljósu úti í heilsugæslu. Hún mælir legbotninn 36 cm, hjartsláttinn hjá Dúlla litla 160-170 og þrýstinginn hjá mér 150/95. Hún vildi því senda mig upp á Dagönn uppi á Lansa í mónitor. Ég fór þangað í gær, fimmtudag, eftir að hafa bara sofið í einn og hálfan tíma :S Þrýstingurinn mældist sky high... Neðri mörk 107! Þetta þýddi innlögn og lyfjagjöf. Litlan ég var náttúrulega ekkert sérstaklega ánægð en að sjálfsögðu vill maður gott eftirlit. Ég er bara svo ofsalega léleg í að slaka á í svona aðstæðum, alveg skelfilegt! Ég var náttúrulega stjarnfræðilega þreytt, með dúndrandi hjartslátt o.s.frv. en gat ekki fyrir mitt litla líf hvílt mig. Ég skánaði í þrýstingi yfir daginn og var svo haldið yfir nótt. Ég ákvað að þiggja svefntöflu fyrir svefninn, einhverja sem á að hjálpa manni að sofna en í rauninni ekki við að hjálpa manni að sofa lengi. Sem betur fer náði ég að sofna og svaf samfleytt í 7 klst! Það hefur ekki gerst í margar vikur. Undir morgunn var svo mældur þrýstingurinn, 140/85 og ég fékk þriðju töfluna af Trandate, 200 mg. Ég ligg eitthvað áfram í rúminu en fer svo á fætur að fá mér morgunmat. Hitti vinkonu mína á ganginum og spjalla við hana og litlu prinsessuna sem hún var að eignast. Eftir að hafa staðið kyrr í smástund varð ég bara að labba af stað, því ég fann hvað mig var farið að svima. Þetta gerðist svo aftur þegar ég var að tala við aðra stelpu seinna um morguninn. Ég var svo útskrifuð með helmingi minni skammt undir hádegi. Ég á því núna að taka því rólega og taka 3*100 mg af þessu blóðþrýstingslækkandi lyfi. Svo mæti ég aftur eftir 4 daga í tjekk....

Jæja, þetta er nú sólarsaga síðustu vikna! Biðin styttist óðum eftir að við fáum að líta litla prinsinn augum. Líklega bara 3 vikur í hann, mér þykir ekki ólíklegt að ég verði sett af stað um það leyti. Mikið hlökkum við til! :):):)

Herra Skrítli og Skoppa

2009-06-18T23:07:00.000Z

Gunnar Magnús gerðist svo frægur að hitta Skoppu í Húsdýragarðinum um daginn. Hann var nú svolítið heiminn... eins og hann segir sjálfur.

Nýju Spiderman stígvélin

2009-06-18T23:03:00.000Z

Gunnar Magnús valdi sér ný stígvél. Hann var genginn niður úr og upp úr hinum gömlu, sem voru nr. 22. Ég lét mæla númer hvað barnið notaði og það reyndist vera 25,5.... Úbbosí...

Gunnar Magnús og Dúlli litli 16. maí 2009

2009-06-18T23:00:00.001Z

Viðtal hjá ljósmóður - 33 vikur og stóri bróðir í fæðingu

2009-06-12T09:03:00.002Z

Við bumbi litli fórum og heimsóttum ljósmóðurina í fyrradag, þá komin 32 vikur og 5 daga. Allar tölur komu blessunarlega vel út, nema kannski sú sem minnstu máli skiptir... sem vogin segir. Þrýstingurinn var 130/75 og legbotninn 33 cm en það er víst ágætis viðmiðun að hæð hans í centimetrum sé u.þ.b. meðgöngulengd í vikum. Ég er búin að þyngjast um 8 kg alls. Gallapagus sneri head-down, líkt og mig grunaði og var með hjartsláttinn í 140-160 slögum á mínútu. Mig grunaði að lilli sneri svona, út af hreyfingunum, sem eru yfirleitt svipuðum stað. Hann kúrir venjulega með bossann sinn hægra megin, þessi litli gullmoli, og ég er viss um að hann verði mjög sterkur, m.v. kröftugleika hreyfinganna. Nú styttist óðum í að við fáum að líta litla prinsinn augum :)

Stóri bróðirinn segir allt gott. Hann er svo stjarnfræðilega yndislegur að foreldrarnir tala varla um annað allan daginn :) Hann gerir sér líklega eins vel og hann getur, miðað við aldur og fyrri störf, grein fyrir því að fjölskyldan sé að fara að stækka. Alltaf þegar ég treð honum í einhver föt sem eru að verða of lítil, þá segir hann að litli bróðir verði bara að fá þau, því hann sé svo lítill. Einnig segir hann oft að litli bróðir megi eiga þetta eða hitt með honum. Þegar við fórum að sofa í gærkvöldi, þá færði hann sig innst í rúmið sitt og benti mér á auða plássið við hliðina á honum og sagði að þarna ætti litli bróðir að lúlla. Ég sagði honum þá að litli bróðir myndi lúlla inni hjá Mömmu og Pabba (sem hefur nú alveg verið rætt áður líka) í pínulitlu rúmi sem heitir vagga. Og að hann væri alveg ofsalega lítill fyrst, næstum því eins og dúkka. Og hann myndi nú mest bara sofa líklega. "Og gráta... uhuuhuu, uhuhuuu" svaraði Gunnar Magnús þá, með leikrænum tilburðum. Svo töluðum við um að eftir svolítinn tíma myndi litli bróðir læra meira og meira. Fyrst að brosa, svo hlæja.... en það væri langt, langt þangað til hann færi að tala. Þannig m.a. reynum við að undirbúa litla, stóra strákinn okkar undir það sem er í vændum :)

Junior deild saumaklúbbsins í heimsókn

2009-05-13T22:12:00.005Z

16. apríl síðastliðinn fengum við Gunnar Magnús góða gesti: Nokkrar vinkonur Mömmunnar úr grunnskóla-saumónum og börnin þeirra. Það var orðið ansi langt síðan við hittumst síðast og það var mál til komið að halda svona ungahitting.

Linda, Íris, Védís og Úlfdís Vala ræða þjóðmálin.

Berglind Björt og Gunnar Magnús voru góð saman að leika inni í herbergi.

Arnór Steinn, tvíburabróðir Berglindar, dundaði sér við lestur góðra bóka.

Úlfdís Vala og Jakob Kári kynnast betur. Jakob horfir í átt til Ernu múttunnar sinnar og stóra bróðurins Arnórs.

Þau eru flott par :)

Íris og Linda tékka á litlu dísinni.

Fyrsti hikstinn :)

2009-05-07T11:34:00.002Z

Jæja, nú var ég í fyrsta skiptið að finna fyrir hiksta hjá litla bró. Það er ótrúlegt hvað maður verður stoltur yfir einhverju svona, sem hljómar kannski frekar ómerkilega. Ég brosi alveg allan hringinn :) Duglegur þessi litli strákur :)

Sykurþolspróf og viðtal hjá ljósu - 27,5 vikur

2009-05-06T12:46:00.002Z

Í gær fór ég í sykurþolspróf úti á heilsugæslu. Prófið fór þannig fram að ég átti að mæta fastandi (á mat OG vökva...) frá því klukkan 22 kvöldið áður. Ég kveið þessu hálfpartinn því flestar nætur fæ ég mér sopa af vatnsglasi á náttborðinu. Ég held ég sofi mest með opinn munninn, lekkert, I know, þ.a. ég verð massa þurr í munninum. Ég náði hins vegar að sofa ágætlega fyrir blessað prófið og var blessunarlega ekkert að drepast úr þorsta. Svo mætti ég stundvíslega klukkan átta. Þá er byrjað á að stinga mig tvisvar, fyrst í fingurinn og svo með sprautu. Svo var ég látin drekka sykursullið, hratt vinsamlegast. Úff... þvílíkt ógeð. Manni fannst allt eitthvað rangt við að innbyrða þetta. Og blandan var ekki einu sinni með appelsínubragði, eins og í Ameríku :( Svo fór ég bara inn í herbergi með bók að lesa og lá á bekk. Mátti ekki hreyfa mig mikið og ekki sofna. Þannig að ég las bara og las... Hafði keypt mér skemmtilega bók daginn áður, sem mælt var með í jóganu: Árin sem enginn man. Mæli hiklaust með henni við alla sem hafa áhuga á barnauppeldi og sjálfsþekkingu. Síðan var tekin blóðprufa eftir klukkutíma og svo aftur eftir tvo klukkutíma. Gaman að vera stungin svona oft eða þannig... en ég þjálfaðist í þessu.

Í morgun hitti ég svo ljósuna mína og fékk að vita að niðurstaðan úr sykurprófinu var fín. Fyrir áhugasama var niðurstaðan 4,1 fastandi, 5,7 eftir 1 klst og 6,4 eftir 2 klst. Blóðþrýstingurinn var 120/80, engin þyngdarauking hjá mér frá því síðast og legbotninn í 28 cm. Gallapagus var hinn rólegasti meðan ljósan þreifaði á honum og var með hjartsláttinn í 150 slögum á mínútu.

Næsta viðtal er svo við 32 vikur.

Viðtal hjá ljósu - 25 vikur og 5 dagar

2009-04-22T13:52:00.004Z

Ég og Galli litli vorum að koma úr viðtali hjá ljósunni. Það gekk bara vel. Blóðþrýstingurinn hjá mér mældist 130/70, sem er fín tilbreyting frá fyrstu mælingunni við 11 vikur, til dæmis :) Ég er búin að þyngjast um 4,5 kg og hæð legbotns mældist 27 cm, þ.a. það er allt að gerast! Ég tjáði ljósunni að ég væri farin að vera þreyttari en áður og að mig grunaði að járnið væri farið að lækka. Hún tók því fram nálina og stakk í puttann á mér, sem var vont, og komst að því að járnið væri í fínu lagi (120). Hún vildi því flýta sykurþolsprófinu, til að ganga úr skugga um hvort þreytan sé nokkuð vegna meðgöngusykursýki. Ég fer því í slíkt próf eftir tvær vikur. Krossa fingur :)

Galli litli var hinn hressasti að vanda. Hann mældist með hjartsláttinn 150 og sparkaði í ljósuna þegar hún potaði í húsið hans :)

Viðtal hjá ljósu - 22 vikur

2009-04-01T23:22:00.005Z

Ég fór og hitti ljósmóður þegar ég var komin 22 vikur og allt kom vel út. Gallapagusinn var með hjartsláttinn á milli 150 og 160 slögum á mínútu, enda var hann akkúrat að gera morgunleikfimina þegar mælingin fór fram :) Hæð legbotns var mæld 24 cm, blóðþrýstingur 120/80 og ég var búin að þyngjast um 1,5 kg.

Nú er mallinn líka orðinn svolítið myndarlegur og orðið tímabært að skjalfesta það með myndatöku. Þessi mynd var tekin á Hótel Búðum, Snæfellsnesi, þegar ég var komin 24 vikur.

Gallapagus II

2009-03-25T09:02:00.003Z

Nú hafa foreldrarnir kíkt í umslagið góða, sem fór með þeim heim úr 20 vikna sónarnum og í því voru upplýsingar um kyn litla sumarungans. Gunnar Magnús er að fara að eignast lítinn bróður :)

20 vikna sónar, Gallapagus II

2009-03-19T21:34:00.004Z

Eins og einhverjir hafa tekið eftir var komin teljari hérna efst á síðunni fyrir óléttu nr. tvö hjá okkur Gunna. Við vorum í 20 vikna sónar í dag. Þar fengum við að sjá þetta fallega, fullkomna barn :) Barnið lék á als oddi. Opnaði m.a. munninn upp á gátt og gerði sig líklegt til að stinga táslunum upp í! Það er ekkert yndislegra en að fá að verða vitni að þessu kraftaverki. Allar mælingar komu vel út. Til dæmis var vökvi í maganum sem bendir til þess að bumbugullið sé farið að drekka, sem er víst gott merki.

Út úr alls kyns mælingum fengum við svo dagsetninguna 31. júlí 2009. Það er sami dagur og sónar sagði við 12 vikur.

Ég verð að vera jafndugleg að documentera þessa óléttu, eins og þá fyrri. Blóðþrýstingurinn mældist í hærra lagi í upphafi meðgöngu. Neðri mörk voru 85 við 11 vikur og 80 við 16 vikur. Ég er með blóðþrýstingsmæli hérna heima og þar hafa neðri mörkin verið að mælast frá 64 og upp í 78. Það verður fylgst með þessu, þar sem blóðþrýstingurinn varð of hár síðast, þó bara alveg í lokin. Ég reyni bara að fara vel með mig og þar með litla bumbugullið :)

Ég hef verið að fara í meðgöngujóga í Lótus jógasetri og finnst það alveg yndislegt. Jóga er eitthvað sem ég ætla að halda áfram að stunda eftir meðgönguna, er tótallí málið fyrir mig.

Jæja... ég held áfram að lofa myndum! Þær koma bráðlega ;)

Gunnar Magnús 3ja ára

2009-02-18T12:15:00.002Z

Nú er frumburðurinn orðinn 3ja ára. Á óskalistanum þetta árið voru batman og bílar. Og hann vildi endilega halda Batman-afmæli. Hins vegar fann móðirin hvergi Batman-afmælisútbúnað, svo Gunnar Magnús sætti sig við Mikka mús og félaga. Við buðum fjölskyldunni í afmælisbröns laugardaginn 7. febrúar og það var mikið fjör. Gunnar Magnús fékk margar fallegar gjafir og var yfir sig ánægður. Helst mátti ekki slökkva á Brio-rafmagnslestinnni, heldur láta hana ganga hring eftir hring og prinsinn svaf í súpermanbúning með batman í annarri og sportbíl í hinni. Þannig að hann kom afar vel undan afmælinu :) Mér fannst hann líka merkilega duglegur að muna hver gaf honum hvað, sem gladdi mig mjög.

Nú er orðið aðeins of langt síðan ég skrifaði eitthvað hérna síðast... 23. október... Nú þarf ég að rifja upp hvað hefur á daga okkar drifið síðan þá. Efst á listanum eru náttúrulega jólin. Núna gerði Gunnar Magnús sér mun betur grein fyrir þeim og mundi greinilega ekki vel eftir síðustu jólum. Á aðventunni var ýmislegt brallað tengt jólaundirbúningnum, bakstur, gönguferðir í bænum að skoða jólasveinana í búðargluggunum, fylgst með tendrun Oslóartrésis og fleira. Grýla er karakter sem Gunnar Magnús pældi töluvert í og hafði gaman af, merkilegt nokk. Uppáhaldslagið hans, by far, er Ó Grýla. Hann sat stundum við tölvuna og hlustaði á Ó Grýlu á repeat ábyggilega yfir 10 sinnum!

Svo komu jólin sjálf og þau voru frábær! Gunnar Magnús opnaði gjafirnar sínar af mikilli yfirvegun (ég er ekki að grínast) og var hæstánægður með innihöldin. Lék sér yfirleitt með hverja gjöf í smástund áður en hann sneri sér að næstu. Svo vaknaði kappinn á jóladagsmorgun/-hádegi og hljóp beint út í glugga til að sjá hvað jólasveinninn hefði nú gefið honum í skóinn. En ekki hvað? Sveinki var búinn að mæta alla 13 dagana á undan! Foreldrunum tókst þó að útskýra fyrir honum að sveinarnir væru nú bara 13 og væru lagðir af stað aftur upp í fjöllin. Hann sýndi því skilning.

Ég held að næstu jól hljóti að verða öðruvísi. Þá á hann eftir að muna eftir síðustu jólum og mun hafa vissar væntingar sem skapa spennu. Núna hafði hann engar væntingar og allt þetta frábæra kom honum stöðugt á óvart. Ég gæti t.d. alveg trúað að pakkaopnanir munu taka styttri tíma næst :S En það kemur nú bara í ljós.

Ég náði að vera í jólafríi í tvær vikur sem var alveg yndislegt og Gunni mætti bara í tvo daga til vinnu, milli jóla og nýjárs. Þannig að við náðum þvílíku quality time :)

Jæja... Ég skelli inn myndum bráðlega.

Yfir og út...

Myndir frá september og október 2008

2009-01-19T21:46:00.000Z

Þroskaferli Gunnars Magnúsar

2008-10-23T22:56:00.000Z

Nú er Gunnar Magnús orðinn tæplega 2ja ára og níu mánaða. Honum fleygir áfram í öllum þroska, þessari elsku. Ég er alveg gapandi á hverjum einasta degi yfir öllu sem hann lætur út úr sér. Það hefur t.d. sýnt sig að hann hefur ótrúlega gott minni. Hann man eftir ótrúlega mörgu, þó það hafi ekki verið rifjað upp lengi, aldrei skoðaðar myndir eða neitt. Til að mynda rifjar hann oft upp atburði úr hringferðalaginu okkar í sumar, leikhúsferðirnar okkar á Skilaboðaskjóðuna (í febrúar!), Skoppu og Skrítlu og Einar Áskel, bíóferð með Pabba á Bubba byggir (í mars eða apríl) og alls kyns ómerkileg smáatriði sem drengurinn man og tekur upp á að rifja upp við hin ýmsu tækifæri.

Honum gengur afskaplega vel á leikskólanum og unir sér mjög vel. Fyrst eftir sumarfríið var hann svolítið tregur að fara og erfiðlega gekk að kveðja hann á morgnana (var samt alltaf mjög kátur þegar maður sótti hann og tregur að koma heim). Núna er ekkert mál að fara á morgnana en eflaust á eftir að koma tímabil aftur þar sem honum finnst þetta erfitt. En hann er þvílíkt að blómstra núna. Hann er með þeim elstu á sinni deild núna, kannski að það spili inn í með þetta aukna sjálfsöryggi.

Mér finnst Gunnar Magnús vera ansi næmur á líðan eða ástand fólks, að minnsta kosti veitir hann því athygli hvernig fólki líður. Oft segir hann mér þegar við erum að labba einhvers staðar, að þessi eða hinn sé leiður og segir yfirleitt í kjölfarið að viðkomandi sé aleinn, eins og það sé hræðilegt! Gunnar Magnús er orðinn mun sjálfstæðari og minna háður okkur foreldrunum, svona hvað móralskan stuðning varðar. Hann er alltaf til í að vera eftir, hvert sem við förum. Það er alveg hætt að virka "ok, þá er mamma bara farin"-trixið.... Honum er alveg sama og segir bara bless með bros á vör.

Jæja, ég vildi bara skrifa nokkur orð hérna, það er svo gaman að lesa þetta allt saman eftir á :)

Af okkur fullorðna fólkinu er allt gott að frétta. Við erum náttúrulega bara að melta þetta nýja ástand sem blasir við okkur næstu árin en höfum yfir nákvæmlega engu að kvarta :) Ég veit líka að það á eftir að koma svo margt gott upp úr þessu ástandi, þó svo að illa eigi eftir að fara í mörgum praktískum málum einstaklinga og fyrirtækja. Við þurfum bara að muna hvað skiptir allra mestu máli í lífinu og sinna því og rækta.

Bröns 19. október

2008-10-23T21:39:00.000Z

Gunnar Magnús hefur mjög gaman af því að leika risaeðlu.

Einn, tveir, þrír....

Svona fyndinn munnsvip set ég upp þegar ég nota grínröddina mína.

Það var ógisslega gaman að borða pasta.

Og fá sér smá vatn með...

Svo fékk ég ís í eftirrétt. Jibbí!

Gaman að grína með ísspýtuna. Langhressasta barnið á Vegamótum.

Hringferð 2. hluti

2008-09-22T22:33:00.000Z

Þá er ég loksins búin að láta verða að því að hlaða upp myndunum úr seinni hluta hringferðarinnar. Það eru nú ekki nema 2 mánuðir síðan við komum heim...

Myndirnar rekja ferðasöguna.

Hjónasvipur?

2008-09-03T14:04:00.001Z

Þessi ágæta mynd af okkur hjónum var tekin við Ísafjarðardjúp um verslunarmannahelgina. Honum Jóhannesi Benediktssyni, vini okkar, datt á einhvern hátt í hug að klippa út búta úr andlitunum á okkur, snúa við og færa á milli. Myndin breytist furðu lítið. Þetta var útkoman:

Brulli og hringferð

2008-08-07T13:04:00.000Z

Í dag er 14. ágúst og síðast var bloggað 25. júní. Ætli það sé ekki kominn tími á uppfærslu. Við erum búin að bralla sitthvað síðan síðast; brúðkaup, hringferð um landið, sumarfrí, milljón sundferðir, svo fátt eitt sé nefnt.

Við Gunni vorum gefin saman í Dómkirkjunni þann 28. júní. Dagurinn var í alla staði fullkominn og stórkostleg upplifun sem gleymist aldrei. Vinir og fjölskylda glöddust með okkur og gerðu daginn að því sem hann var, fullkominn og ógleymanlegur. Kærar þakkir fyrir okkur :) Ef einhver vill sjá myndir frá atburðinum, þá setti ég nokkrar myndir á facebook.

Nokkrum dögum síðar lögðum við af stað í hringferð um landið. Við byrjuðum á að tjalda í Húsafelli, þar sem veðrið var best þar. Við enduðum á að vera í þrjár nætur, þar sem við fengum félagsskap af Barðstrendingunum. Veðrið var ótrúlega gott og þetta svæði er ótrúlega fallegt og aðstaðan góð. Við fórum að sjálfsögðu í sund alla dagana. Tjaldið sem við tókum með var stóra, ameríska Walmart-tjaldið okkar, sem er ekki beint hannað fyrir íslenskar aðstæður. Himinninn nær rétt svo framyfir kantana en ekki hliðarnar og loftið er úr fíngerðu neti, sem tryggir að manni sé kalt á nóttunni (á Íslandi). Þetta er samt sem áður frábært góðviðristjald :) Jæja, nóg um tjaldið.... Næst héldum við til Akureyrar og verður nánar fjallað um það í næstu færslu um hringferðina. Þið verðið því bara að bíða spennt eftir frekari ferðasögum.

Hérna kemur fyrsti hluti myndaseríu úr hringferðinni:

17. júní

2008-06-25T18:28:00.000Z

Lítill íþróttaálfur fær sér kakó á kaffihúsi með foreldrunum eftir að hafa hlustað á Geir Haarde á Austurvelli.

Flott myndavélabros hjá GMG.

Set þessa mynd með til staðfestingar um að Mamman hafi líka verið með.

Ú jé. Maður getur verið mjög töff með sólgleraugu.

Eftir langan og strangan dag lognaðist Gunnar Magnús útaf á bakinu á pabba sínum. Hápunktur dagsins var að sjá Gosa og Skoppu og Skrítlu, ótrúlega gaman!

Hjá Stínu frænku

2008-06-09T23:14:00.001Z

Gunnar Magnús fór í sleepover til Stínu og familíu um helgina. Þar var ýmislegt brallað, m.a. pissaði ungi maðurinn í kopp!! Legg ekki meira á ykkur... Ekkert smá duglegur. Hann hefur samt ekki verið neitt spenntur fyrir að endurtaka leikinn en það kemur eflaust bráðlega. Stína og krakkarnir bökuðu köku sem Vala og Gunnar Magnús skreyttu myndarlega (þó með smá afföllum á kremi...). Restinni af deginum vörðum við svo á ylströndinni en sökum afslöppunar eru engar grafískar heimildir fyrir því.

Gunnar Magnús fær sér íþróttaálfsvítamín, það fæst ýmislegt upp í munn í hans nafni.

Reyndar vildi hann fljótlega skila vítamíninu...

Vala þeytir rjóma með kökunni og Stína rétt styður við :)

Búið að skreyta kökuna fallega. GMG á bólakafi í rúnstykki með súkkulaðiputta eftir kökuskreytinguna.

Svo var farið út í garð að "vinna". Maður passar sig ofsalega vel í stiganum.

Stína sæta.

"Hæ Mamma".

Stefán og Gunnar Magnús, sjúklega sætir frændur.

Stefán sýnir litla herramanninum graslauk.

..og gæðir sér á honum.

Grindavík

2008-05-28T16:36:00.000Z

Við Gunnar Magnús brugðum okkur í sleepover hjá Ömmu Hildi í Grindavík um síðustu helgi, á meðan pabbinn fór að klífa Hvannadalshnjúk. Við vorum í sérlega góðu yfirlæti hjá Ömmu og höfðum það voða gott. Við fórum að sjá litla heimalinga, sem verið var að gefa pela og jeminn hvað þeir tóku vel við. Við vorkenndum þeim ákaflega mikið, því þeir áttu enga mömmu :( Hin lömbin fengu bara að drekka hjá mömmu sinni. Við sáum líka hesta, lóur og hrafna í sveitinni. MJÖG spennandi allt saman.

Amma á skemmtilega lest sem maður gat dundað sér með lengi.

Alltaf jafngaman að sulla.

Amma og Lilli búin að hátta.

Litla lambið fær að súpa.

Þau voru svo sæt!

Úti á svölum að gera "blásukúlur"

2008-05-07T17:34:00.000Z

Tilbúinn að fara út. Fékkst til að brosa fyrir myndatökumann :)

Ótrúlegt hvað hægt er að dunda sér á þessum tveimur fermetrum!

Gunnar Magnús er duglegur að blása sápukúlurnar, eins vídjóið sýnir. Svo er ekkert skemmtilegra en að horfa á eftir þeim fjúka eitthvert upp í loftið og ekkert fyndara en þegar þær lenda á einhverju og springa. Það er ótrúlegt hvað þessi einfalda athöfn er skemmtileg :)

Bílar

2008-04-25T15:56:00.000Z

Eitt af því sem nóg er af hérna niðri í bæ, eru bílar. Við erum alltaf að ganga götur með bílastæðum og undanfarið hefur Gunnar Magnús verið að spyrja mig hvað bílarnir heita. Hann er mjög áhugasamur og þekkir núorðið alveg bíltegundirnar Toyota, Volkswagen, Renault, Benz, Ford og Skoda. Margar aðrar er hann næstum kominn með á hreint en ruglar stundum saman Hondu og Hyundai, skiljanlega. Okkur leiðist því aldrei þegar við erum úti að labba og hafa foreldrarnir vart undan við að svara spurningum frumburðarins :)

Afmæli Gunna stóra

2008-04-25T15:41:00.000Z

Gunnar Örn varð 28 ára á sumardaginn fyrsta. Hann hélt upp á daginn með því að bjóða familíunni upp á lambalæri og með því. Á eftir gæddu gestir sér svo á hinni víðfrægu súkkulaðiköku Ömmu Addýjar. Allt sló þetta vel í gegn og urðu menn saddir og sælir :)

Fótboltastrákur

2008-04-23T22:49:00.000Z

Gunnar Magnús var að horfa á pabba sinn spila FIFA við félaga sinn, þar sem annað liðið var Barcelona. Pabbinn mundi svo að sonurinn hefði fengið Barcelona-búning í afmælisgjöf og fannst tilvalið að dressa barnið upp. Hann var alveg ofsalega hrifinn (sonurinn), alveg þangað til hann flaug á andlitið þar sem polyester-fótboltasokkarnir voru svo sleipir á parketinu. Það féllu mörg tár en hann fékkst samt til þess að brosa aðeins fyrir móður sína, þó með dudduna, til að documentera hvað hann var fínn í kvöld.

Páskafrí í Danmörku

2008-04-10T23:37:00.001Z

Það gengur ekki að heimasíðan sé uppfærð á 2ja mánaða fresti hérumbil. Þá fara pistlarnir að vera lengri og lengri og maður kemur sér ekki í að skrifa þá.

En oh well. Nokkrir skemtilegir hlutir hafa gerst síðan Gunnar Magnús varð tveggja ára. Litli herramaðurinn er til að mynda búinn að fara í leikhús á rúmlega tveggja klukkutíma sýningu, góðan daginn. Það var reyndar smá hlé, en samt ótrúlegur árangur. Ég fékk sæti fyrir okkur á endanum nálægt útgangi, svo við gætum nú hæglega komið okkur út ef herramaðurinn myndi missa þolinmæðina. Það stóð stundum tæpt en hafðist þó :) Leikritið hét Skilaboðaskjóðan og er sýnt í Þjóðleikhúsinu. Mælum með því ;)

Svo erum við líka byrjuð að sækja Sunnudagaskólann í Dómkirkjunni. Það er ekkert smá yndislegt. Frábær aðstaða fyrir svona litla strumpa sem þurfa að hafa nóg í gangi til að halda athyglinni og svo er líka frábært hvað þetta er lítill hópur. Mjög kósý stemmning þarna uppi á loftinu yfir kirkjunni.

Nú telur Gunnar Magnús upp að þrettán, foreldrarnir gríðarstoltir yfir því. Einnig er hann orðinn algjör púslmeistari og púslar leikandi allt að 16 púsla púslum. Púslipúsl... hljómar skrýtið þegar maður segir þetta oft...

Svo er það mál málanna. Við fórum í páskafrí til Kaupmannhafnar. Við bjuggum í góðu yfirlæti hjá Óla og Charlotte í Rödovre. Við gerðum ýmislegt okkur til dundurs. Skruppum á Bakken og í dýragarðinn, Lyngby Storcenter (gaman að hitta þig, Dagrún!) og í sumarbústað á Norður-Sjálandi. Meget hyggeligt.

Læt nokkrar myndir úr fríinu fylgja.

2ja ára!!!

2008-02-20T23:10:00.000Z

Gunnar Magnús varð 2ja ára þann 10. febrúar. Þá var sko blásið til risaafmælisveislu í Garðastrætinu og við fengum marga góða gesti. Gunnar Magnús var í skýjunum yfir þessu öllu saman. "Ammili Magnus" og "Jé á 'edda" heyrðist gjarnan. En Gunnar Magnús talar oftast um sig sem Magnus (með mjúku g-i, eins og Svíar myndu gera, hehe).

Annars er barnið farið að tala svo mikið og það er svo óendanlega gaman að því!!! Við litli læstum okkur úti í gær og þurftum að bíða eftir pabbanum í rúman klukkutíma, þ.a. við skelltum okkur á Te&Kaffi í Eymundsson og splæstum á okkur kóki/kókómjólk og kexköku. Það var svo yndislegt að sitja þarna með honum og spjalla um allt sem fyrir augu okkar bar; plakötin, matinn, bækurnar og fólkið. Setningarnar hans vantar gjarnan sagnir, t.d. sagði hann: "Mamma gikku ekki", og átti þá við að hann hafði fengið disk undir kökuna sína en ekki ég. Svo talar hann nú allra mest um fólkið í kringum sig og kallar það ýmist konan, mamman, pabbinn, amman eða afinn (voða sjaldan kallinn, þegar ég fer að spá í það, flestir ungir menn eru pabbinn). Þetta er allt í góðu, nema ég fer aðeins hjá mér þegar hann kallar tiltölulega ungt fólk ömmur eða afa. Einnig spyr hann ALLTAF: "keredda?" þegar einhver labbar framhjá. Svo svarar hann yfirleitt sjálfum sér eftir smá stund eða þegar ég hef sagst ekki vita það, "hetta mamman" eða "hetta pabbinn". Ohh.. Ég elska þennan strák svo óendanlega mikið og hef svo gaman af því að vera með honum :)

Ég verð líka að láta eina litla sögu fylgja með.. fyrst ég er að tala um málþroskann hjá Magnus (lesist með sænskum hreim) mínum. Við vorum á leið í afmæli til Öglu, frænku okkar og ég var búin að tala um það fyrr um daginn að við værum að fara í afmæli til hennar Öglu og endurtaka það oft.... Svo erum við komin og ég nem staðar fyrir utan húsið. Þegar ég er að losa hann úr bílstólnum og segi honum að við séum komin til Öglu, fer hann strax að líta leitandi í kringum sig. Lítur svo hissandi á mig og spyr: "kar Ugla ?!?". Þá hafði þessi elska séð fyrir sér að við værum á leið í afmæli til einhverrar uglu.... sem hann þekkir auðvitað mætavel úr dýrabókunum sínum.

Mér finnst svo yndislegt hvað börn eru opin fyrir öllu. Þau vita oft greyin ekkert hvað bíður þeirra og finnst ekkert sjálfsagðara en að skreppa í afmæli til fugls.

Annars læt ég hérna fylgja með myndir úr afmælinu. Kærar þakkir allir fyrir komuna og fallegu gjafirnar!

Bubbi byggir á öskudag

2008-02-08T00:12:00.001Z

Jólin - Christmas

2008-02-07T23:54:00.000Z

Vala í pössun í desember - With cousin Vala

2008-02-03T22:30:00.000Z

Gunnar Magnús skreytir jólatréð

2007-12-23T17:04:00.000Z

Gunnar Magnús keyrir strætó - Gunnar Magnus driving a bus

2007-12-05T17:22:00.000Z

Ég var að renna í gegnum myndir frá því í sumar og rakst á þetta skemmtilega myndband.

I was going through photos that were taken in Tenerife in August and ran into this fun video.

Gunnar Magnús sér kisu

2007-11-10T11:37:00.001Z